Temat sociale kanë zënë përqindjen më të madhe të hapësirës informative në televizionet kombëtare gjatë Nëntorit. Si çdo muaj, të dhënat janë përllogaritur nga ekipet e monitorimit dhe analizës në AMA dhe reflektojnë, ndër të tjera, edhe temat e trajtuara të lajmeve në televizionet kombëtare.
Siç duket në përmbledhjen e mëposhtme, pas Sociales, me 14.15%, vjen Politika që në Nëntor, krahasuar me muajin paraardhës, ka fituar terren duke zënë 13.89%. Më pas vjen Sporti me 10.68%, veprimtaria e Drejtësisë, Lajmet Ndërkombëtare e me radhë.
Trendet e temave të lajmeve të trajtuara në edicionet informative në radiot dhe televizionet kombëtare, si dhe të dhëna të tjera të detajuara për kohën e partive politike në subjektet audiovizive, volumin e reklamave, aktorin sinkron etj., gjenden të detajuara në faqen zyrtare të AMA-s, në Monitorimin e Përmbajtjeve, https://ama.gov.al/monitorimi-i-permbajtjeve/ dhe përbëjnë një bazë shumë të mirë informacioni për çdo lloj studimi të tregut mediatik audioviziv në vend.
